Miino raggii dhigayay ay kula qaraxday duleedka degmada Balcad

 
Guddoomiyaha degmada Balcad ee gobolka shabeelaha Hoose Qaasim Cali nuur ayaa sheegay in qarax ka dhacay xalay deegaanka Danida ay ku dhinteen ugu yaraan lix ka tirsan maleeshiyada ururka Al-Shabaab, kuwo kalena ay ku dhaawacmeen
 
Wuxuu  sheegaya in qaraxaasi uu dhacay abaarihii 11 fiidnimo ee xalay,  xilli  qaraxaasi la dhigayey meel u dhow buundo ku taalla degaanka Danida oo u dhexeeya Balcad iyo Afgooye. “abaarihmeesha ay wax ka dhaceen waxay u  dhaxaysaa Balcad iyo Afgooye, ma aha wax qarxay baabuur ee waa Miino ayay iyagu dhigayeen. dadka degaankuna waxay noo sheegeen 8 dhimasho ah iyo  4 dhaawac ah, Miinow ay dhigayeen ayaa ku qaraxday Abaarihii 11 habeenimo.
 
Guddoomiyuhu wuxuu kaloo sheegay in ururka al-shabaab ay dab qabadsiiyeen tuulada baarlow oo u dhaxaysa balcad iyo Afgooye, hase yeeshee ma sheegin khasaaraha ka dhashay, mana jirto ilo madax banaan oo xaqiijinaya arrintaasi. Goobta uu qaraxu ka dhacay  ee ay ku dhinteen lixda Al-shabaabka ah ayaa u dhow goob toddobaadkii hore uu ka dhacay qarax kale oo lala beegsaday babuur siday khudaar oo ay ku dhinteen lix qof oo ka ganacsada wax soo saarka beeraha.
 
 

Shir amniga ku saabsan oo Muqdisho ka dhacay

Kulan looga hadlayay sugida amniga guud ahaan dalka Soomaaliya ayna ka qeybgaleen mas’uuliyiin ka tirsan dowladda federaalka iyo diblomasiyiin caalami ah ayaa ka dhacay magaalada Muqdisho.
 
Shirka wada wada jir u guddoomiyay Wasiirka Amniga Gudaha Soomaaliya Maxamed Abuukar Isloow Ducaale iyo Danjiraha Midowga Yurub u fadhiya Soomaaliya, waxaana goob joog ka ahaa taliyaha ciidamada booliiska Soomaaliyeed Jeneraal C/xakiin Daahir Siciid Saacid iyo wafuud ka socotay dowlad gobolleedyada dalka ka jira.
 
Waxyaabaha ugu muhiimsan oo shirkaasi la iskula soo hadal qaaday waxaa ka mid ahaa dhaqan gelinta qodobada la xiriira dhinac amniga dalka Soomaaliya, kuwaa oo ka soo baxay shirkii bishii May ee sanadkan ka dhacay magaalada London.
 
Wasiirka Amniga gudaha Maxamed Abukar Isloow Ducaale oo shirka furay ayaa sheegay in uu shirkaan daba socdo shirar hore oo ka dhacay gudaha iyo dibadda dalka,kuwaa oo la xiriiray dhismaha ciidamo Qaran oo isku dhaf ah, islamarkaana ciidamadu ay isku diyaariyaan sidii ammaanka dalka ay uga la wareegi lahaayeen AMISOM.
 
Dowladda Soomaaliya ayaa horay u sheegtay in ay dhiseyso ciidamo isku dhaf ah oo awood leh si mustaqbalka dowladda Soomaaliya ugala wareegi karto howlgalka midowga Africa AMISOM nabad-galyada guud ahaan dalka Soomaaliya

Dibadbax looga soo horjeedo argagixisada Shabaab oo maanta ka dhacay Baydhabo

Dibadbax aad u ballaaran oo looga soo horjeedo qaraxi Soobe iyo falalka arxan darrada ah ee maleeshiyaadka Shabaab ayaa maanta ka dhacay magaalada Baydhabo.


Dibadbaxan ay ka qeybqaateen Kumanan dadweyne ah kuwaasoo socod kusoo maray wadooyinka waaweyn ee magaaladaasi, waxeyna ku qeylinayeen ereyo ka dhan ah maleeshiyaadka Shabaab.


Dibad Baxayaasha ayaa sheegay in xiligan la joogo wakhtigii loo midoobi lahaa la dagaalanka Al shabaab. waxaana Dhalinyarada Boroordiiqaysay ay wacad ay ku mareen  in ay u dhimandoonaan Difaaca dalkooda.


Ficillada waxuushnimada ah ee Al shabaab ay sameeyaan ayaa ah kuwo Marwalba Bulshada Soomaaliyeed ku abuura . Murugo . Balse Xasuuqan ka dhacey Soobe ayaa u muuqada mid mideynaya dareenka Ummadda Soomaaliyeed . madaama Shabaab ay u soo jeesteen daadinta dhiigga shacabka Soomaaliyeed ee abriyada ah.

 
 

XDS oo dagaal ku dilay hoggaamiyeyaal al-Shabaab ka tirsanaa

Ciidamada Xoogga Dalka Soomaaliyeed ayaa weerar ay ku qaadeen agagaarka degaanka Goof-gaduud ku dilay hoggaamiye-sare Sheekh Cabdi Yuusuf iyo dhawr nin oo kale oo ka mid ahaa hoggaamiye-dhexaadka kooxda al-Shabaab. 
Ciidamadu waxay kaloo halkaas ku dileen tobananeeyo maleeshiyada al-Shabaab ka tirsanaa, iyagoo hub badan oo ay maleeshiyadu wadatayna la wareegay. Kooxda dhiigyacabka ah ee al-Shabaab ayaa dhan kasta haatan laga hareereeyay, iyagoo in badan oo ka tirsani ay isku soo dhiibeen dowladda Soomaaliya.
Dilalka lala beegsanayo madaxda al-Shabaab ayaa sii kordhay waxii ka dambeeyay dilkii amiirkooda, Axmed Godane, oo horraantii sanadkan la dilay, taas oo niyadjab wey u keentay kooxda. Waxaa kaloo kooxda curyaamiyay dhaqaalo daro weyn kadib markii laga xorreeyay degaano badan, sida magaalada dekedda ah ee Baraawe, oo uu dakhli ka soo gali jiray, halkaas oo ka dhoofin jireen ama ka soo dejin jireen walxaha adduunka mamnuuca ka ah sida dhuxusha iyo daroogada.

Khilaafkii Axmed Cumar iyo Cali Dheere oo faraha ka sii baxay

Loolanka iyo isqabqabsigii ka dhaxeeyay Axmed Cumar iyo Cali Maxamed Raage (Cali Dheere) oo ka mid ah ragga ugu sarreeya ururka al-Shabaab ayaa lagu soo warramayaa in loo caal waayay oo uu faraha ka sii baxayo.

Cali Dheere ayaa Axmed Cumar ku eedeeyay in uu daba-dhilif u yahay dagaalyahannada ajnabiga ee al-Qaacida Soomaaliya ka jooga, isagoo wax kasta oo ay u baahdaan siiiya halka maleeshiyada degaanka ee al-Shabaab ay gaajo u dhimanayaan. Cali waxuu kaloo Cumar ku eedeeyay in uu lunsaday hantidii ururka al-Shabaab taas oo boqolaal malyan oo doolar lagu qiyaasay. Lacagtaas ayaa hoggaamiyihii hore ee al-Shabaab, Axmed Godane, waxuu ku aaminay Cumar si uu hawlaha ururka ugu furdaamiyo, balse Cumar waxuu lacagtaas u isticmaalay dano khaas ah, sida guursashada dumar badan iyo abaabulka caweysyo lagu tunto ama raaxeysto.

In ka badan 60 argagixiso oo lagu dilay aagga buuraha Galgala

Ciidamada ammaanka ee dowlad-goboleedka Puntland ayaa lagu soo warramayaa in ay dileen in ka badan 60 al-Shabaab ah isla markaana dhawr aag ka qabsadeen xagjiriinta laba maalmood oo dagaal adagi ku dhex maray aagga buuraha Galgala oo bariga 50 kiiloomitir uga beegan magaalada dekedeedka Boosaaso.
Ciidamada ayaa u awood sheegtay argagixisada, iyagoo nolol ku qabtay tobaneeyo ka tirsan horjoogayaasha al-Shabaab oo uu ku jiro Mukhtaar Cabdinuur Axmed oo loo yaqaan Axmed Gurey iyo Axmed Cabdi Maxamed. Ciidanka ayaa sidoo kale argagixisada ka xorreeyay dhawr goobood, sida Gurixoor, Dhagahdher, Guri Dharkeyn iyo Diin Digle oo ahayd gabbaadka ugu weyn ee al-Shabaab, taas oo 37km kaga beegan dhanka tuulada Galgala. Hawlgallo xiriir ah oo lagu nadiifinayo haraaga al-Shabaab ee ku harsan buuraha Galgala ayaa haatan socda.

Page 3 of 6

Subscribe To Our Newsletter