Al-Shabaab oo sare u qaadeen dhaca

 

Ururka dilaaga ah ee gacan-ku-dhiiglaha ah ee al-Shabaab ayaa la sheegayaa inuu ka tanasulay ka ganacsiga dhuxusha, iyadoo warbixin dhawaan lagu sheegay in ganacsigaas uu ka doortay uruurinta lacagaha iyo xoolaha uu ugu yeero zakawaadka.


Sida warbixintu sheegeyso, dhaq-dhaqaaqa argagixiso ee ururka ayaa hoos u dhacay waxaana loo aaneynayaa in taasi sababtay dhaqaale xumada uu ku sugan yahay, iyadoo uu door-biday inuu sii xoojiyo lacagaha baadka ah ee xaaraanta ah ee uu ka uruuriyo ganacsatada iyo xoolaha uu ka fara maroojisto xoola-dhaqatada masaakiinta ah.


Ururka dilaaga ah ee al-Shabaab waxaa danta ku khasabtay inuu ka tanasulo ka ganacsiga dhuxusha maaddaama dowladda Soomaaliyeed ay dadaalkeeda ku aaddan ka hortagga dhaqaalaha soo galo al-Shabaab iyo xiridda waddo kastoo ururku ka helo dhaqaale.


Waxaa si aad ah loo wiiqay awoodda dhaqaale iyo tan milatari ee ururka al-Shabaab, wuxuuna door-biday inuu sare u qaado dhaca cad ee xoolaha xooladhaqatada iyo miraha beeraleyda. Sida ay sheegeen dad ka soo goostay ururkaas, wuxuu si joogta ah si arxan darro ah lacago uga dhacaa ganacsatada iyo xoola-dhaqato.


Waxaase ururku hortaagan dadweynaha iskooda isu abaabulay ee la dagaallamaan ururkaas, kuwaasoo ka daalay in maalin walbo xoolahooda si sharci darro ah looga qaato, iyadoo ururrada noocaan ah ee waayahan dambe aad u soo bateen ayna dagaallo xooggan ku qaadaan saldhigyada iyo xarumaha canshuurta ee uu leeyahay ururka dilaaga ah ee al-Shabaab.

Howl-gallada lagu cirib-tirayo Shabaab oo socdaan


Guddoomiye ku xigeenka degmada Buulo burde Cismaan Geedi Cilmi oo la hadlay Wabaahinta dowladda ayaa sheegay in ciidamada ammaanku ay wadaan howlgallo maleeshiyada Al-shabaab looga xoraynayo deegaannada ay kaga dhuumaalaysanayaan gobolka Hiiraan.

Guddoomiyaha ayaa beeniyay wararka sheegaya in ciidamada Hiil walaal ee Jabuuti ay ka baxeen deegaanno ka tirsan gobolka Hiiraan,isagoo xusay in wararkaas uu yahay dacaayad ay faafinayaan dad kasoo horjeedo dowladnimada.

Ugu dambayntii Guddoomiye ku xigeenka dagmada Buulo Burde Cismaan Geedi Cilmi ayaa shacabka Soomaaliyeed ugu baaqay in ay la shaqeeyaan Ciidamada Qalabka sida, si looga hortago dhagarta ay maleegayaan maleeshiyaadka argagaxisada ah ee al-Shabaab.
 

Kooxaha is abaabulay ee dagaalka kula jiraan Shabaab oo bateen

 
Waxaa waayahaan dambe aad u soo bateen ururrada ay xubnaha ka yihiin xoola-dhaqatada ku sugan goobaha uu ururka dilaaga ah ee al-Shabaab weli ka arrimiyo. Dadweynaha waxaa ku khasbay in ay la dagaallamaan ururkaan diinta Islaamka ka been sheegay, maaddaama ururkaas uu xoolohooda habeen iyo dharaarba iska boobo.

Dhawaan waxaa dagaal culus uu dhex maray urur ka kooban xoola-dhaqato iskooda isu abaabulay si ay isaga difaacaan dhaca iyo boobka joogtada ah ee ururka al-Shabaab uu ku hayo xoola-dhaqatadaas. Dagaalkaas wuxuu ka dhacay degmada Xudur ee gobalka Bakool ka dib markii xubno ka tirsan maleeshiyada al-Shabaab ay si boob ah xoolo uga kaxeysteen xoola-dhaqato ku nool degmadaas.

Dadka Deegaanka ee is-abaabulay oo la baxay Cali Qaran ayaa Deegaanka Yab-Yab in Muddo ah ku dagaalamayey maleeshiyada baxsadka ah ee al-Shabaab, waxaana markii dambe ay nabad-diidka kasoo furteen xoolihii ay ka qaateen, iyadoo durba goobta ay gaareen Ciidamada Xooga Dalka oo u gurmaday dadka shacabka ah.

Ugaas Cali Dirir waxaa uu ka mid yahay abaabulayaasha deegaanka ee isku biirsaday in ay la dagaalamaan argagixisada si naftooda iyo maalkoodaba uga badbaadiyaan, wuxuna sheegey in ay diyaar u yihiin la dagaalanka cadowga ummadda Soomaaliyeed.

Shacabkaan la baxay Cali Qaran oo la dagaalamaya cadowga Soomaaliyeed ayaa waxay u badan yuhiin dad da’ah oo ay ka go’antahay in ay dhiigooda u daadiyaan difaaca dadkooda, sharaftooda iyo dalkooda.

 “Waxaan u adkeysan weyney dilka, gowraca iyo dhaca joogtada ah oo ay noo geysanayaan maleeshiyada al-Shabaab, kadib waxaan go’aansannay in aan u hub uruursano oo aan la dagaalanno arintaasna waan ku guuleysannay,” ayuu yiri Cabdulaahi Aadan Maxamed oo ah taliyaha ururkaas dhawaan la aasaasay.
 
Top
We use cookies to improve our website. By continuing to use this website, you are giving consent to cookies being used. More details…