Al-Shabaab oo nin ku toogatay degmada Doon Buraale

Ururka dilaaga ah ee al-Shabaab oo looga bartay inuu ciqaabo qof Allaale qofkii ka hortago fikradahiisa gurracan wuxuu dhawaan dil toogasho ah ku fuliyay nin lagu magacaabo Axmadey Qaadi Maadey. 

Toogashadaas waxay ka dhacday fagaare ku yaalla deegaanka Doon Buraale oo hoostaga degmada Qoryooley ee gobolka Sh/Hoose. Qaadiga magac ku sheegga maxkamadda al-Shabaab ee gobolkaasi oo fagaaraha ka akhriyey xukunka ayaa sheegay in Axmadey uu qirtay dhammaan eedeymaha lagu soo oogay, islamarkaana ay ku cadaatay in uu sameeyay ficilkii Qowmu Luud, sida uu hadalka u dhigay.

Waxaase is weydiis mudan inay arrinta lagu eedeeyay ninkaas uu yahay ficil aan lagu arkeyn dadweynaha Soomaaliyeed ama dhaqanka guud ee Soomaaliyeed, waxaana hubaal ah in ninkaan dembiga lagu soo oogay uu yahay mid been abuur ah.

Inta badan waxaa deegaanada ay maamusho al-Shabaab ka dhaca xukuno u badan dil toogasho ah, kuwaas oo qaar kood lagu fuliyey dad lagu soo eedeeyey basaasnimo.

Dadka ka faallooda arrimaha amniga waxay intooda badan isku raacaan in dilalka noocaan ah lagu soo oogo shacabka ku sugan goobaha uu al-Shabaab ka arrimiyo, iyagoo sheega in dadkaas ay inta badan yihiin kuwa kasoo horjeedaan dhaqammada al-Shabaab iyo falalkooda gurracan.
 

Beenta hoggaanka al-Shabaab uu u sheego da’ yarta ismiidaamiyaan

Kooxda dhiig-cabtada ah ee al-Shabaab waxaa had iyo jeerba ay ku caddaatay inay askareeyaan carruur aad u da’ yar kuwaasoo ay si khasab ah uga soo wataan waaliddiintooda oo ay dabeetana ku xareeyaan xarumo ay maskaxda kaga baddalaan.


Waxaa xaqiiq ah in ay kooxdaani ay yaambo iyo katarabiil ay ka dhigteen dhalinyaro Soomaaliyeed oo aan wax la barin iyo dad waawayn oo maangaab ah iyo qaar kale oo nolosha ka dhacay.


Kooxdu waxaa mar walba lagu eedeeyaa inay mareen habaabiyaan carruur mustaqbal wanaagsan u noqon lahaayeen dalkeenna Soomaaliyeed, iyadoo waaliddiin badan ay sheegeen in si khasab ah looga wato carruurtooda.


Maxamuud Cabdi Cabdiraxmaan waa wiil dhallinyaro ah oo dhawaan lagu xukumay xabsi daa’in kaasoo isu dayay inuu qarxiyo munaasabad Ahlusunna ay ku maamuusayeen dadkii uga geeriyooday dagaalka ay kula jiraan al-Shabaab.


Maxamuud qaraxaas wuu ku fashilmay waxaana ciidammada amniga u suurta gashay inay qabtaan inta uusan weli qarxin goobtaas.
Wuxuu wiilkaan sheegay in ururka al-Shabaab ay been u sheegeen inuu jannada kula kulmi doono 72 haween xuurulceyn ah kuwaasoo kusoo dhaweyn doonaan jannada.


Waxaa sidoo kale loo sheegay inuu goobta uu qarxin doono ay ku sugan yihiin dad aan muslin aheyn iyo in hadduu guto waajibkaas uu jannada geli doono.


Waxaase layaab leh in hoggaanka sare ee al-Shabaab uusan ka qeyb qaadaneynin casuumadda ay carrurta u sheegayaan ee la kulanka 72-da xuurulceyn oo aysan iyaga laftooda ka qeyb qaadaneynin ismiidaaminta. 

Xoolaleyda oo wacad ku mareen inay iska dhiciyaan al-Shabaab

 

Dagaal xooggan oo u dhaxeeyay xubno ka tirsan ururka dilaaga ah ee al-Shabaab iyo xoolaley ayaa la sheegayaa inuu ka dhacay deegaanka Ceel Cadde ee gobalka Gedo.


Dagaal ayaa la sheegay inuu bilowday kaddib markii xubnaha al-Shabaab ay damceen inay xoola ka dhacaan xoolaleyda balse waxaa la sheegay inay diideen in xoolahooda la iska qaato.


Guddoomiyaha deegaanka Ceel Cadde ee Gobolka Gedo Cabdirashiid Cali Cabdi Qoorleex ayaa sheegay in dadka xoolo dhaqata ay la dagaalameen al-Shabaab, islamarkaana waxaa uu ku baaqay in taageero dheeraad ah la siiyo dadka shacabka ah ee dagaalka kula jira dagaalamayaasha al-Shabaab.


Sidoo kale guddoomiyaha ayaa sheegay in hadda xaaladda ay dagan tahay, islamarkaana ay dhaq-dhaqaaqyo xooggan ay ka wadaan deegaano ka tirsan gobolka Gedo.


Horay ayaa waxaa deegaano iyo degmooyin ka tirsan gobolada Hiiraan iyo Shabeellaha Dhexe  ka dhacay dagaalo u dhaxeeyay al-Shabaab iyo dad is aruusaday oo la magac baxay Macaawiisleey, kuwaas oo sheegay inay Shabaab dhibaato kala kulmeen.


Al-Shabaab ayaa xoola dhaqatada iyo beeraleyda ka qaado lacago ay ku sheegeen inay yihiin sako balse ay dadka shacabka ah ku sheegeen in la xalaaleysanayo dhaca xoolahooda.

Top
We use cookies to improve our website. By continuing to use this website, you are giving consent to cookies being used. More details…