Howl-gallo lagu cirib-tiro al-Shabaab oo socdaan

Ciidamada sida gaarka ah u tababaran ee DANAB ayaa waxaa ay howlgallo ka sameeyeen deegaano dhaca duleedka magaalada Kismaayo ee gobolka Jubbada Hoose, halkaasoo ay ku sugnayeen xubno ka tirsan argagixisada al-Shabaab.
Saraakiisha Hoggaamineysay howlgalkaas ayaa waxaa ay sheegeen inay ku duuleen xog sirdoon oo ay heleen, isla markaana ay howlgallo qorsheysan ka fuliyeen deegaanka Araare oo ka tirsan Gobolka Jubbada Hoose ee Maamulka Jubbaland.

Taliyaha qeybta ururka 2aad ee Ciidanka DANAB ee Gobolka Jubbada Hoose Gaashaanle Muraal ayaa sheegay in ciidanka deggan deegaanka Baarsanguuni ay fuliyeen howlgalkaas, isla markaana ay dileen xubno ka tirsan maleeshiyaadka al-Shabaab balse dhankooda aan wax khasaaro ah soo gaarin.

Sidoo kale, waxaa uu hadalkiisa intaasi ku daray in howlgallada ay sii wadi doonaan, isla markaana howlgalkaan ka xiga uu noqon doono deeganka Koban iyo deegaano kale oo ay ku sugan yihiin argagixisada al-Shabaab.

Ciidammada Dowladda iyo kuwa maamulka Jubbaland ayaa muddooyinkii u dambeeyay dhaq dhaqaaqyo waxa ay ka wadeen deegaanno ka tirsan gobollada Jubbooyinka halkaas oo ay ku beegsanayeen xubno ka tirsan maleeshiyaadka naflacaariga ee al-Shabaab.
 

Horjoogeyaasha al-Shabaab oo weli ka soo goosanaya ururka

 
Labo ka mid ahaa horjoogeyaasha sare-sare ee al-Shabaab ayaa isku soo dhiibeen Ciidammada xoogga Dalkeenna Soomaaliyeed ee ku sugan gobalka Gedo.

Wisaarradda warfaafinta ee Dowlladda Federaalka Soomaaliya ayaa sheegtay in Musdhaf Ibraahim Isaaq iyo Maxamed Xasan Madhaley ay isu soo dhiibeen saraakiisha Ciidammada Dowladda ee ku sugan magaalada baardheere iyagoo wataan hubkooda.

Inta aysan isa soo dhiibiin, labadaa horjoogeyaal waxay u xil-saarnaayeen sir-doonka kooxdaas iyo xabsiyada ay sida xaq-darrada ah dadka ugu taxaabaan, waxaana isa soo dhiibkoodaan loo aaneynayaa iyadoo awoodda kooxda al-Shabaab si aad ah loo wiiqay maaddaama lagu wado duqeyn joogta ah.

Dowladda Soomaaliyeed waxay sheegtay in isa soo dhiibka labada horjoogeyaal ay jab weyn ku tahay ururka dilaaga ah ee al-Shabaab iyo in arrintaan ay xaqiijineyso jabka guud ee milatari ee kooxda soo wajahay. Sidoo kale, dowladda ayaa ugu baaqday in xubnaha kale ee al-Shabaab ay ka faa’iideystaan cafiska guud ee ay dowladda fidisay ayna ka soo goostaan ururkaas dalkeenna u diiddan nabadda.

Sida ay dowladdu sheegtay, labadaa nin waxay horay xiriir ula sameeyeen saraakiisha dowladda kuwaasoo ka dhaadhiciyay inay ka soo goostaan ururkaas.
 
 

Dagaallada dadweynaha ay ku qaadaan al-Shabaab oo bateen

 

Waayahaan dambe, waxaa bateen dagaallada u dhaxeeya maleeshiyada ururka xag-jirka ah ee al-Shabaab iyo xoola-dhaqatada iskooda is-abaabulay ee la dagaallamaan ururkaas. Xoola-dhaqatada waxay ka soo horjeedaan waxa ururka al-Shabaab ay ugu yeeraan sakada ee ah dhaca cad ay u geystaan dadweynaha.


Toddobaadkii lasoo dhaafay, dagaal xooggan oo u dhaxeeya dad xoola dhaqato ah iyo ururka al-Shabaab ayaa ka dhacay deegaanno hoos yimaada gobolka Hiiraaan.


Iska hor imaadkaan oo ka dhacay tuulooyin hoos yimaada deegaanka Halgan ayaa yimid kadib markii xoola dhaqatada weerar ku qaadeen ururka al-Shabaab oo horay xoola uga dhacay.


Qaar ka mid ah dadka deegaanka ayaa u xaqiijiyay warbaahinta in kun neef oo al-Shabaab horay ay u dhaceen dib looga soo furtay.
Al-Shabaab ayaa la sheegay in markii hore ay xoolahaan u qaateen wax ay ugu yeeraan Zakawaat oo sanad waliba ay ka uruuriyaan deegaannada ay weli ka arrimiyaan.


Ma ahan markii ugu horreysay oo dagaal uu dhex maro xoola dhaqato ka biyo diidsan bixinta Zakawaatka iyo ururka al-Shabaab. Daba-yaqadii bishii lasoo dhaafay ee Maayo sannadkaanna, saraakiil iyo dagaallamayaal ka tirsan kooxda al-Shabaab ayaa la sheegay in lagu dilay dagaal ka dhacay deegaanka Xagarey oo 40kM u jira degmada Cadale ee gobolka Shabeellaha Dhexe.


Kooxda Macawiisley ayaa la sheegay in dagaal gaatin ah ay ku qadeen deegaanka Xagarey oo al-Shabaab ku sugnayeen, waxaana halkaasi dagaal kooban oo khasaaro geystay uu ku dhex maray al-Shabaab iyo Macawiisley.
Dadweynaha Soomaaliyeed ee masaakiinta ah waxay ka daaleen dhibaatooyinka kaga imaanaya dhanka ururka dilaaga ah ee al-Shabaab waxay wacda ku mareen inay iska celiyaan ururkaas.

Top
We use cookies to improve our website. By continuing to use this website, you are giving consent to cookies being used. More details…