Xubnaha al-Shabaab oo isaga cararay saldhigyadooda


Maleeshiyaadka ka tirsan kooxdaa diinta ku been abuuratay ee Al-Shabaab ayaa bilaabay inay ku sugnaan waayaan saldhiyada ay ku leeyihiin qaar ka mid ah deegaanada ay ku sugan yihiin, taasina waxay ka dambeysay kadib markii duqeymo is xig-xiga oo lagula beegsaday goobo badan oo ka tirsan gobolada dalka iyo waliba weerarro dhulka ah.

Sida ay wararka sheegayaan, deegaanno ka tirsan gobalka Galgaduud ayaa la sheegaya in maleeshiyaad ka tirsan dhiig-cabtada al-Shabaab ay isaga carareen goobahaasi, ka dib markii ay diyaarado Joog hoose ku socda oo Howgalo fulinaya soo gaareen deegaanadaasi.

Dadka deegaanka ayaa sheegaya in xubnaha ururka Ilaah ka furtay ee al-Shabaab ay gebi ahaanba isaga carareen saldhigyadooda ku yaalla deegaannada Ceel-garas, Xamur, Ceel-lahelay, Wamooley iyo Ceel-qooxle oo dhanka koonfur-bari ka xiga magaalada Dhuusamareeb iyadoo howl-gallo habeysan oo loogu talo galay in dhiig-cabtada lagaga saaro dalka ay Ciidammada Xoogga Dalka oo kaashanaya dowladaha dalka Soomaaliyeed saaxiibka la ah.

Wararku waxay intaas ku dareen in baqdinta al-Shabaab ay gaartay inay ku amraan shacabka in aysan u soo dhawaan saldhigyada ay kaga sugnaayeen deegaanadaasi, iyagoona hore bulshada kaga mamnuucay isticmaalka taleefoonada smartphones-ka ah. 

Dhanka kale, 12 xubnood oo ka tirsanaa ururka dhiig-cabtada ah ee al-Shabaab oo ay ka mid yihiin horjoogeyaal sare ayaa dhawaan lagu laayay deegaanka Basra ka dib markii Ciidammada Xoogga Dalka ay howl-gallo ka fuliyeen degmadaas.

Howl-galkaas waxaa lagu dilay horjooge lagu magacaabo Macallin Daahir, kaasoo argagixisada al-Shabaab u qaabilsanaa falalka foosha xun iyo dhibaatooyinka ururku u geysto dadweynaha ku dhaqan degmada Balcad iyo deegaanada hoostaga.

Waxaa sidoo kale weerarkaas lagu dilay Cabdiraxmaan Abuu Salmaan oo isna dhiig-cabtada al-Shabaab u qaabilsanaa dhinaca xukunada lagu boobo, laguna laayo shacabka Soomaaliyeed ee masaakiinta ah.
 

Dagaalka u dhaxeeya Shabaab iyo Daacish ee salka ku haya hantida ay bililiqeystaan


Waxaa waayahaan dambe socday dagaal xooggan oo u dhaxeeya labada kooxood ee argagixisada ah ee al-Shabaab iyo Daacish. Iska horimaadka ciidan ee labada kooxood ee argagixisada ah kuma saleysno arrin diimeed, wuxuuse ku saleysan yahay sidii loo kala qeybsani laha hantida iyo maalka ay ka bililiqeystaan dadweynaha Soomaaliyeed.


Maleshiyada argagixisada al-Shabaab waxay si joogta ah u fuliyaan dilalka xubnahooda ay uga shakiyaan inay taageersan yihiin ururka Daacish si ay u dhabar jebiyaan taageeridda urur aan isaga aheyn iyo in uu ahaado ururka keliya ee ka faa’iidi karo hantida laga bililiqeysto dadweynaha Soomaaliyeed.


Ururka al-Shabaab wuxuu dhawaan olole kale oo sifayn ah ku qaaday horjoogayaal  taageersanaa Daacish oo ku sugnaa degmada Jilib ee Jubada dhexe, ka dibna halkaasi la isku dhaafsaday rasaas, waxaana halkaasi ku geeriyooday Abu Anas Al Masri  xilli  isaga iyo koox kale ay  ku sugnaayeen masaajid ku yaalla degmada waxayna dad goob joogayaal ah xaqiijiyeen in halkaasi ku burburay masjidkii.


Ururka al-Shabaab wuxuu ka cabsi qabaa in lala wadaago maalka uu ka boobo dadweynaha maaddaama ururka Daacish uu isna dadweynaha maalkooda dhaco.

Ciidammo cusub oo la baxay magaca badbaado oo la aasaasay


Xukuumadda Federaalka Soomaaliya ayaa shaacisay in ay sii soconi doonaan howl-gallada ka dhan ah al-Shabaab ee dalkeenna lagaga saarayo ururkaasi xag-jirka ah.

Dowladdu waxay sheegtay in dhawaan la aasaasay ciidammo qeyb ka ah kuwa Xoogga Dalka kuwaasoo loogu magac-daray badbaado, una kala qeybsan labo kooxood oo la kala yiraahdo badbaado kow iyo badbaado laba. Dowladda Soomaaliyeed waxay ciidammadaas ku tilmaamtay kuwa al-Shabaab ka saari doonaan Goballada Labada Shabeelle.

Dowladda ayaa sheegtay in ay ka shaqeynayaan sidii Ciidanka Xoogga Dalka oo isku filan ay ula dagaallami lahaayeen ururka xag-jirka ee al-Shabaab, dalkana nabad uga dhigi lahaayeen.

Ururka Al-Shabaab ayaa fariisimo ku leh Gobolada Shabeelaha hoose iyo dhexe, halkaasi oo ay ka fuliyaan weeraro ku dhifoo ka dhaqaaq ah oo ay ku qaadaan dadweynaha Soomaaliyeed ee aan hubeysneen.

Top
We use cookies to improve our website. By continuing to use this website, you are giving consent to cookies being used. More details…