Hooyo iyo saddex carruurteeda ah oo qarax Shabaab ku dhaawacay


Ururka dilaaga ah ee al-Shabaab ayaa sheegtay mas’uuliyadda qarax ka dhacay makhaayad ku taallo magaalada Dhuusamareeb ee maamulka Galgaduud halkaasoo ay ku dhaawacmeen 5 qof oo afar ka mid ah ahaayeen hooyo iyo saddex carruurteeda ah.
Kooxda dhiig-cabtada ah ee al-Shaabab waxay baraha internet-ka ku sheegtay inay laysay maleeshiyaad mushrikiin ah. “Mujaahidiinta ayaa howlgallo khasaara lagu gaarsiiyay maleeshiyaadka Mushrikiinta ka fuliyay magaalada Dhuusamareeb ee wilaayada Galguduud,” ayuu lagu daabacay bar internet oo xiriir la leh ururkaas diinta ka been sheegay.

Xaqiiqadase dhabta ah ayaa ah in hooyo shaax ku karineysay makhaayaddaas iyo carruurteeda ay ku dhaawacmeen qaraxaas. In hooyo masaakiin ah oo carruurteeda u shaqeyneysay lala beegsado qarax oo dabeetana baraha lagu sheego in qarax lagu laayay mushrikiin iyo murtaddiin waa shey looga bartay al-Shabaab waxayna tusineysaa munaafaqnimada kooxda. Waa arrin laga xumaado in calooshood u shaqeystayaal soo xirtay shaar diineed ay iska daadiyaan dhiigga muslimiinta masaakiinta ah ee aan wax galabsan.
 

Qiilka uu Shabaab u raadiyo dilka uu u geysto shacabka

 

Ururka dilaaga ah ee ummadda Soomaaliyeed u diiday nolol iyo horumar ee al-Shabaab wuxuu qarax la beegsaday dad shacab ah oo ku sugnaayeen hoteelka Cascasey ee ku yaallo magaalada Kismaayo halkaasoo ay ku naf waayeen ilaa 27 qof, halka kuwa kaloo badan ay ku dhaawacmeen.


Cod lasoo galiyay bar internet oo xiriir la leh ururkaas ayuu afhayeenka “milatariga” al-Shabaab, Cabdicasiis abuu Muscab, ku sheegay in dagaalyahannada ururkaas ay goobtaas ku laayeen murtaddiin iyo in hoteelkaas uu ahaa dhismo loogu talo galay in lagu shirqoolo ummadda Soomaaliyeed.


Waa arrin looga bartay ururkaan diinta ku been abuurtay in uu dad masaakiin ah uu laayo oo uu dadkaas ugu yeero mushrikiin. Wuxuu ururkaan dilaaga ah raadiyaa qiil iyo sababta uu u daadiyo dhiigga muslinka, iyadoo codkaas uu afhayeenka ku sheegay in dadkii weerarka lagu laayay ay ahaayeen Soomaali baasaboorada shisheeye sita kuwaas oo dowladaha ay metelaan ugu dhaartay in ay shacabka Soomaaliyeed diintooda iyo dhaqankooda ka fitneeyaan.


Sida uu afhayeenka sheegay, ujeeddada dadkii la laayay ayaa ah in ay diinta ka saaraan ummadda Soomaaliyeed taasoo tusineyso xadka munaafaqnimada al-Shabaab ay gaartay. Dad muslin ah in la laayo oo haddana been laga sheego waxay tusineysaa xaaladda quus ee ku jiro ururka al-Shabaab waana arrin layaab leh.


Waxaase hubaal ah in shacabka Soomaaliyeed ay si wanaagsan u garanayaan naxariis darrada iyo dilalka aan kala sooca laheyn ee uu ururka ay munaafaqiinta hoggaaminayaan ee al-Shabaab uu u geysto ummadda Soomaaliyeed. Weerarkaas waxaa lagu dilay Hodan Naleeye oo aheyd wariye caalamka u soo bandhigi jirtay wajiga quruxda badan ee dalkeenna Soomaaliyeed iyadoo barta YouTube-ka ay ku laheyd chanel lagu magacaabo Integration TV.

Deegaanno muhiim ah oo lagala wareegay al-Shabaab

 

Ururka dilaaga ah ee diinta Islaamka ka been sheegay ee al-Shabaab ayaa dhawaan lagala wareegay deegaanno ka tirsan gobalka Shabeellaha Hoose oo uu hadda ka hor dadweynaha Soomaaliyeed ku dhibaateyn jiray.


Korneyl Maxamed Cabdullaahi Caraalle, Taliyaha ururka 35-aad Guutada 7-aad qeybta 60-aad ee Ciidanka Xoogga Dalka Soomaaliyeed ayaa warbaahinta u sheegay in ciidanku la wareegeen deegaannada kala ah Leego, Yaaqbirweyne, Madax-maroodi iyo deegaanno kale oo halkaasi ku dhow.


Taliyuhu wuxuu sheegay in Ciidanka Xoogga Dalka iyo xubnaha al-Shabaab halkaasi dagaal uu ku dhexmaray, ayna dileen 15 ka mid ah dagaal-yahannada al-Shabaab.


Howlgalkaan ay Ciidamadu ku qaadeen deegaanno iyo tuulooyin u dhaxeeya degmada Walaweyn iyo deegaanka Leego ee Gobolka Shabeelaha Hoose ayaa maleeshiyada argagixisada al-Shabaab looga saaray deegaanno badan oo ay ku dhibaateyn jireen dadka rayidka ah.


Ciidamada Qalabka sida ee Soomaaliya iyo saaxiibada caalamiga ah ayaa si dardar ah ku wado howlgallo argagixisada looga sifeynaayo deegaanada ay kaga dhuumaaleysanayaan Gobolada dalka, iyagoo dilay horjoogayaal iyo maleeshiyaad ka tirsanaa argagixisada.

Top
We use cookies to improve our website. By continuing to use this website, you are giving consent to cookies being used. More details…