Somali News

Nabadda guud oo sare u qaadday kobaca Muqdisho

Magaalada Muqdisho ee caasimadda dalkeenna Soomaaliyeed waxay kasoo kabaneysaa oo ka keceysaa dagaalladii sokeeye ee dalka ka socday dhowr iyo labaatankii sano ee lasoo dhaafay iyo dhibaatooyinkii iyo burburkii uu sababay ururka nabadda kasoo horjeedo ee al-Shabaab.

Haatan waxaa magaalada ka socdaan dhaq-dhaqaaqyo horumarineed kuwaasoo sare u qaadayaan dhaqaalaha guud ee dalkeenna. Dhismooyin cusub oo isha qabanayaan, guryaha la dago waxay beddeleyaan guryihii rasaasaha ka muuqday, waxaan dib u soo laabteen ka ganacsiga hantida ma guurtada ah ee loo yaqaanno real estate kuwaasoo maalinba maalinta ka dambeyso sii kobcayaan.

Hadda ka hor magaalada Muqdisho waxay aheyd goob qalalaas badan waxaase haatan ka furmayaan ganacsiyo kala duwan oo badan. Diyaarado caalami ah ayaa billaabeen inay maalin walbo dadka u kala safriyaan dadka u kala safraan magaalooyinka waaweyn ee caalamka iyo Muqdisho.

Diyaaradad Ethiopian Airlines waxay dhawaan magaalada ka bilowday duullimaad maalmeed iyadoo diyaaraddaas oo Muqdisho soo caga dhigto ay ugu dambeysay 40 sano hadda ka hor.

Sidoo kale, maamulka diyaaradda Kenya Airways waxay ku tala jiraan inay duullimaad maalmeed ka sameeyaan magalooyinka Nairobi iyo Muqdisho.
Dhacdooyinkaan soo kordhay suura-gal meysan aheyn sannoyiinkii lasoo dhaafay, laakiin haatan waxaa suura-galiyay iyadoo haatan amniga guud ee magaalada uu wanaagsan yahay.

Al-Shabaab waa cadowga dhabta ah ee ummadda Soomaaliyeed

Al-Shabaab waa Koox Argagixiso ah barnaamijkooduna yahay inay tarjumaad qaldan ka bixiyaan ama inxiraafiyaan Diinta Islaamka , waxayna xaabo ka dhigtaan qaar ka mid ah dhallinyarada Soomaaliyeed ee aan helin fursadda waxbarashada, dad waawayn oo marin habaawsan iyo qaar kale oo nolosha ka dhacay.

Naxariis darada kooxdaan waxaa daliil u ah beegsiga dadka Bir-magaydada ah sida Caruurta, Hooyooyinka iyo dadka wax tarka u ah Bulshada Soomaaliyeed, taasoo ku tusayso dhagarta kooxda la maaggan tahay ummadda Soomaaliyeed.

Culimada Soomaaliyeed ayaa marar badan ka hadlay dhaqamada xun xun ee Maleeshiyaadka Argagixisada Al-Shabaab ay ku dhibaateeyaan dadka Muslimiinta ah. Shareecada Islaamku way xarrintay in la daadiyo dhiigga qof ama dad aan waxba galabsan, waxaana Ilaahay ugu gooddiyay qofkii si xaqdarro ah ku daadiya dhiigga muslinka in uu gelinayo naartiisa uuna ku waarayo, caro Ilaahay, Lacnad iyo cadaab wayn.

Waxaa Nasiib darro ah maleeshiyaadka Shabaab fahamkooda, fikirkooda iyo ficilkooda qalloocan dartii waxay bannaysteen dhiigga dadka aan waxba galabsan oo ay si joogto ah u daadinayaan, iyagoo hadana ku faanaya gumaadka dadka shacbiga sida dhacdadii qaraxa ee dhawaan ka dhacday Muqdisho oo al-Shabaab ay ku laayeen dadka rayidka oo ku guda jiray baadigoobka iyo xasilinta nolol maalmeedkooda.

Dadweynaha Soomaaliyeed waxaa saaran xil weyn oo ah inay si Alle sidii ay awoodi karaan ula dagaallamaan ururka cadowga u ah horumarkooda, nabaddooda iyo noloshooda si ay uga hortagaan cadowga keliya ee ummadda Soomaaliyeed ay wadaagto ee al-Shabaab.

Cilaaqtan xooggan oo ka dhex jiro hoggaanka sare ee al-Shabaab

Wararka laga helayo deegaanka Jilib ee Jubbada Dhexe ayaa sheegaya in maamulka ururka al-Shabaab uu ku kacay xubnihiisa iyadoo dhowr xubin oo ka tirsanaa ururka la khaarijiyay halka kuwa kalana la qabqabtay.
Sida ay sheegeen ilo lagu kalsoon yahay, al-Shabaab ayaa dooneysay inay xirto xubnahaas looga shakisnaa inay kasoo horjeedaan kooxda iyo ujeeddooyinkeeda. Waxaa sidoo kale la sheegay in xubnahaas ay cambaareeyeen dhaqammada al-Shabaab ee xasuuqa dadweynaha Soomaaliyeed.

Ururka al-Shabaab uma dulqaadan karo in xubno isaga ka tirsan ay kasoo istagaan amarradiisa inta bandanna wuu khaarijiyaa xubnaha noocaas ah.

Sida wararku sheegayaan, waxaa jiraan horjoogeyaal sar-sare oo looga shakisan yahay inay ka mid yihiin ururka Daacish.

Wararka waxay intaasi ku dareen in hoggaamiyeyaasha ururka ay amar bixiyeen in maleeshiyada al-Shabaab ay weeraraan masaajid ku yaallo degmada Jilib oo ay ku dilaan dagaal-yahan ajnabi ah oo lagu magacaabo Abuu Aanas al-Misri.

Sida ay dadka deegaanka sheegeen, ugu yaraan 100 qof oo ay isugu jiraan xubno ka tirsanaa al-Shabaab, ganacsato iyo dagaal-yahanno ajnabi ah. Dadkaas la qab-qabtay waxaa ka mid ah nin u xilsaarnaa wacdiyada been abuurka ah ee uu ururka ka jeediyo idaacadaha afkiisa ku hadlaan.

Xubno kaloo ka tirsan ururka al-Shabaab ayaa sidoo kale lagu qabqabtay tuulooyinka Kuunya Barroow, Buula Fulaay iyo Saakow.

Dhacdooyinkaan soo kordhay waxay muujinayaan ilaaqtanka ka dhex jiro hogaanka ururka iyo ra’yiga kala duwan ee ka dhex jira ururka gudahiisa.

Start
1
2
3
4
5
6
7
8
9
10
End