Al-Shabaab oo ku faantay qarax 10 shacab ah ku dhinteen

 

Ururka dilaaga ah ee al-Shabaab wuxuu baraha internet-ka ee afkiisa ku hadlaan ku sheegay mas’uuliyadda qarax uu la beegsaday shacabka Soomaaliyeed ee ku dhaqan Warta Nabadda halkaasoo ay ku dhinteen ilaa 10 qof oo nolol-maalmeedkooda ku mashquulsanaa.


Wararka qaar waxay sheegayaan in dad goobjoogeyaal ah ay sheegeen in ay goobtaas ka socotay cunto qaybin xilliga uu qaraxu dhacay.


Wararku waxay sheegayaan in ugu yaraan 10 qof oo aan wax dambi ah galin ay ku dhinteen, islamarkaana ay ku dhaawacmeen 12 qof oo kale.

Ururkaan iska dhaadhiciyay in keligiisa uu Muslim yahay, dhammaan dadka kalana ay yihiin murtadiin, wuxuu ku dhaqaaqaa falal aad u dhibaateeyaan nabadda, horumarka iyo nolosha dadweynaha Soomaaliyeed ee doonayaan in noloshooda ay ahaato mid nabad ah oo aan khashkhashaad laheyn.

SNA oo tusay al-Shabaab labadooda keebaa awood leh


Ciidammada Xoogga Dalka Soomaaliyeed ee SNA waxay fashiliyeen weerar ay dhiig-cabtada al-Shabaab kusoo qaadeen fariisiin ciidanku ku leeyihiin degmada Bariire 13-kii bishan Maayo.


Ciidanka Xoogga Dalka ee Bariire ku sugan oo xogta weerarka al-Shabaab sii hayey ayaa waxaa maleeshiyadii soo qaaday weerarka halkaas loogu geystay khaasaro weyn.


Jeneral Odawaa Yuusuf Raage Taliyaha Ciidanka lugta ayaa sheegay in 14 ka mid ah meydadka Shabaabkii Bariire soo weeraray halkaas yaalaan.


Qaar ka mid ah dadka deegaanka ayaa sheegeen in ay arkeen meydad badan maleeshiyad al-Shabaab ah oo halkaasi yaala, ka dib markii ay isku dayeen in ay soo weeraraan fariisin ay lahaayeen ciidanka dowladda ee Bariire.


Deegaanka Bariire ayaa dhawaan waxaa argagixisada al-Shabaab kala wareegay Ciidanka Xoogga dalka gaar ahaan kuwa Danab kuwaas oo halkaas ka sameeyey howlgalo isdaba joog ah,waxaana lagu guda jiraa xilligii ugu dambeeyay ee lagu soo afjari lahaa al-Shabaab.

Miinooyinka uu Shabaab la beegsado shacabka masaakiinta ah

 
Waxaa dhawaan la soo gabagabeeyay howl-gal dhulka looga saarayo miinoyin uu ururka argagixisada ah ee diinta ka been sheegay ee al-Shabaab ku aasay waddada isku xirta Nambar 50 iyo Bariire ee gobalka Shabeelaha Hoose.

Ciidanka Xoogga Dalka ayaa ku guuleeystay in dhamaan miinooyiinkii ku jiray wadadaasi ay ka saaraan si loo badbaadiyo nolosha shacabka Soomaaliyeed ee isticmaala waddadaas

Taliyaha Ciidanka Dhulka Xoogga Dalka jeneral Odawaa Yuusuf Raage ayaa sheegay in howl-galka ujeedkiisu ahaa badbaadinta muwaadiniinta Soomaaliyeed ee isticmaala wadadaasi ee khatarta ugu sugan in miinooyinkaas ku qarxaan.

Ururka dilaaga ah ee al-Shabaab wuxuu si ula kac ah shacabka Soomaaliyeed ula beegsadaa weerarro aan kala sooc laheyn sida miinooyinka uu dhulka ku aaso taasoo tusineyso in ay meesha ku jirin bartilmaameed gaar ah iyo in ururka al-Shabaab aysan dan u aheyn ciddii ku burburto qaraxyada ka dhashaan miinooyinkaas uu dhulka ku aasay. 
 
Top
We use cookies to improve our website. By continuing to use this website, you are giving consent to cookies being used. More details…